Personeli

Sipas strukturës organike nga pikëpamja administrative Kamp-Burgu i Spaçit i njohur si Reparti i Riedukimit nr.303 kishte organizimin si një repart ushtarak.
Ai ruhej brenda me policë dhe nga jashtë me ushtarë. Në këtë kuptim komandanti i kampit nuk ishte vetëm komandanti i ushtarëve, por edhe i të dënuarve. Ai hynte në mjediset e të burgosurve, ishte i ngarkuar me mbarëvajtjen administrative ushtarake të kampit dhe me sigurimin e rregullit.
Pas tij në hierarki vinte Komisari, i cili merrej me pjesën riedukuese në kamp dhe ndiqte punën ideologjike, siç ishte leximi i veprave të diktatorit Enver Hoxhës, i shtypit, ndiqte edhe atë që quhej “përgatitja ideo-politike” e efektivit të policëve dhe ushtarëve.
Komanda ishte vendosur jashtë rrethimit të kampit. Komanda e Repartit përbëhej nga: komandanti, komisari, instruktori politik, punëtori operativ, shifranti, përgjegjësi i administratës dhe radisti. Prapavija kishte 5 oficerë dhe 1 civil, ndërsa Financa kishte 1 oficer dhe 1 civil si llogaritar për të dënuarit.
Spaçi ishte një kamp i rrethuar në një terren të vështirë dhe si i tillë kishte 5 toga për sigurimin e Repartit, si dhe një plan shërbimi i organikës. (foto)
Për sigurimin e brendshëm kishte 1 togë të përbërë nga 42 efektivë (oficer, n/oficer, polic si dhe qen ndjekës).
Për sigurimin e jashtëm të repartit ishin 4 toga, konkretisht;
Toga e I-rë e përbërë nga 3 skuadra, me 35 efektivë (oficer, ushtar, kuzhinier).
Toga II-të, e përbërë nga 3 skuadra, me 18 efektivë (oficer, ushtarë mortaist, pushkatar dhe kimist).
Toga e III-të e përbërë nga 3 skuadra, me 26 efektivë ( oficer, ushtar, kuzhinier).
Toga e IV-të e përbërë nga 3 skuadra, me 24 efektivë (oficer, ushtar, granatahedhës si dhe kuzhinier).

Këto struktura i kishin të detajuara dhe detyrat e tyre, të cilat pasqyrohen dhe në Plane Masash për të parë gatishmërinë luftarake të efektivit në ruajtjen e të dënuarve si dhe në porositë e dhëna nga Drejtoria e Policisë për zbatimin e rregullores së sigurimit e riedukimit të dënuarve.

Struktura organike e kampit – burg të Spaçit propozohej nga komanda e repartit pas një studimi dhe analize mbi bazë të gjendjes aktuale. (foto)